في وصف الدولة

دولة هلهلستان ، عاصمتها سبهللستان و تقع في افريسيا على بعد محطتين ميكروباز من اول ترعة المريوطية تقاطعا مع اول شارع المطار سكة اللي يروح ميرجعش ، و من اهم مدنها قرية الطناش كفر الاتكالية،مركز بير قمع

في وصف الحزب

حزب ذو شكل تكعيبي ... اولي الخلية ... احادي المعطيات ... غير معلوم الاهداف ... و لا مرجعية له على الاطلاق

السبت، 23 فبراير 2008

قرار هلهلستاني رقم 777

بناءا على بعض المشاهدات في الحزب نرجو التكرم بالعمل بالقرارت التالي ذكرها بالذوق و من دون ابداء اية اعتراضات او مشاكسات و في الهدوء و الخفة كده عالسريع السريع يا حلوين

1- بما انه حصل فيما يشبه تسونامي بوستات و فجاءة توقف فانا قررت ان احنا حنقسم طريقة نشر البوستات و حيتم كالاتي، ينشر كل مدون بوست واحد في اليوم و لا يتم نشر اي بوست بعده لمدة يومين لاعطاء الوقت الكافي لمناقشات و التداولات بين السادة الاعضاء و بين العامة من مواطنين الدولة و اذا جه عضو لا مؤاخذة يدون بوستاية و لقى زميله سبقه يبقى يكتب البوست و يسيبه في الدرافت بوكس حتى عشان لو جه عضو تالت و لقى زميله سايب درافت بوست يستنى شوية و بناءا عليه لازمنا و لابد على كل عضو انه قبل ما يعمل اي حاجة في المدونة انه يشيك البوستات و يشوف في حاجة متسابة و لا لأ

2- لما كل عضو منكم يطلع بقرارت و انا اعتمدها ميسبهاش في البوست و خلاص و بمرور الوقت يعدي عليها الوقت و تتنسى، و بناءا عليه فكل متحزبن منكوا بس اعتمدله قرارته و خططه و يتم الموافقة عليها ، يجيي بعدها و يضيف القرارت دي اذا كان ليها مكان على السايد بار أو يعملها بوكس جديد لو نفع، انا مش عاملاكوا ادمنز ببلاش كده يعني

3- العضوة بنت القمر ارجو التكرم بعمل ريدريين واحد لقراءة المدونات الاخرى والتي تكون مختصة بشؤون الاحزاب و لها علاقة بعملنا كمتحزبنين و التي سوف يستفيد السادة الاعضاء من قراءتها، انا احب اعضاء حزبي يكونوا متسأفين و متنورين، اما الريدر التاني فهو حيكون ريدر مدونتنا احنا عشان انا احطه عندي و اراقب البوستات اللي بتتنشر هنا و طبعا اي عضو تاني يحب ياخده مافيش مشكلة بس اهم شئ انه يكون ذاتي التحديث عشان منعتمدش عليكي انت و بس بشكل يدوي انك انت اللي توافقي على البوست او لا
عاوزينه توماتيكي توماتيكي.
4- يمنع منعا باتا المساس من قريب او من بعيد لاي نوع من الاديان، و ذلك لانه كما قلنا اننا حزب لا مرجعية له على الاطلاق و الدين لله و الوطن ليا و انتوا عليكوا بالناس

5-سوف يتم اعادة هيكلة وزارات الحزب و اعادة النظر في المهمات الموكلة اليكم بما ان عدد كبير من الناخبين مردوش عليا و بالتالي حتزيد الاعباء عليكوا لكن انا واثقة من حسن تصرفكم و قدرتكم على القيام بعدة مهام في وقت واحد

6-سوف تكون بعض الوزارات بدون وزير معين لكنها اما مناصفة بين شخصين لرؤيتي انهم قادرين على القيام بالمهام المنوطة بهم و احيانا اخرى هناك وزارات سوف ييكون اسمها ملتي وزير مينسرتيMWM، يعني حنكون كلنا مشتركين فيه و ده حيحصل لما حد يطلع بفكيرة و ينشرها و احنا نتلم عليها زي الدبان و تبتدي الابداعات تشتغل و ساعتها صعب نعرف مين الاب.

7- بس مافيش اي قرارات لغاية دلوقتي لكن كان لازم اوصل لرقم سبعة عشان هو رقم السعد

الله
الحزب
هلهلستان

هناك 10 تعليقات:

أبوشنب يقول...

عشان الهيكلة دايما كانت تجيب النكسة معاها

عايزين نعمل فنيخة للزارات بتاعتنا

وكل الزارارات تتفنيخ

نقوم نشرئب نحو هامات الشواشي

من اجل الحزب

والدولة

والوطن

وتسبحو على خير

كلبوزة لكن سمباتيك يقول...

رجاء من السادة المتحزبنين اللي بيتكلموا لغات اوروبية انهم يتكلموا بالعربي لاني معرفش غير فيومي
و طالبة استفسار عاجل عن كلمة شواشي
و
ريدريين
و اوعوا تطلع حاجة عيب

طيب قولتولي بقى انا ماسكة وزارة اية؟ علشان انا نسيت

كلبوزة لكن سمباتيك يقول...

ابلتي حفصة اموه اموه .. طيب انا عندي اكتراح ليه منعملش يوم لكل مدون ينشر فيه يعني واحدة زيي لازم علشان تنشر تنقع قبلها بيومين و تبطس و تمرش و بعدين تشطف و تزهر و اجي انشر الاقي حد ناشر و الحبال مشغولة اركن البوست يومين
يكمكم يا اختشي
انا اطالب بيوم للنشر بس وحياة عنيكي ابعدي عن الخميس و الجمعة اصلهم اجازة سي الاستاذ جوزي
و
دمتم هلهليين

^ H@fSS@^ يقول...

الى العضو ابوشنب
فهم سمباتيك ايه معنى شواشي لاني انا نفسي مش عارفة ولا كلمة من اللي انت قلته

سمباتيك
ريدريين
يعني ريدر و ريدير
اللي هو البتاع ده اللي بتحطيه ف يالمدونة و يجبلك هو خبر المدونات التانيين و كتبوا فيها ايه و قالوا فيها ايه

تحياتشي


الله
الحزب
هلهلستان

بنت القمر يقول...

حخفصه
الريدر الاولاني بتاع الاحزاب
قوليلي
انهي ا مدونات دي هاتي لي لينكها وانا اعمل الريدر صاروخ
ثانيا الريدر هنا حكايه توماتيكي دي ها احاول فيه واذا ما نفعش ها انزل كل ما يكتب هنا لانه عندي ريدر اولي مش عارفه ينفع ريدر تاني
تانيا
برضه اسفه عن الانقطاع اليومين اللي فاتوا
اعدك متابعه العمل بجد
الله
الحزب
هليهستان

بنت القمر يقول...

حفصه
الريدر عاوز اكاونت وانا الاكاونت بتاعي عليه ريدر
اللي عاوز ريدر يكتب لي اي ايميل ويديني الباسوورد اقوم الطعله الكود لاني معنديش اي مرارة اعمل اكاونت من اول وجديد
مش لازم بتاع مدونتك او مدونه اي حد
اي ايميل موجود ومعاه باسوورد او حد يتبرع ويعمل اكاونت علي الجيميل وانا الطعه له الريرد في اي مكان

بنت القمر يقول...
أزال المؤلف هذا التعليق.
بنت القمر يقول...

عملت الريدر يا حفصه وجبت كوده وانتي شلتي مننا فعاليه التحكم في المدونه يعني بقيت مش ادمينز
طب اعمل ايه بالكود؟؟؟
بعد ما طلع عيني فيه
ها ابعت ليكي الكود ميل

كلبوزة لكن سمباتيك يقول...

ها
قفشتو اللي لعب بالمكرفون و قال
هااااااااااااا انا الشعب؟

مين
هه
مين؟

كلبوزة لكن سمباتيك يقول...

hoooss
ew3o el sha3b yas7a