قرار هلهلستاني رقم 777

بناءا على بعض المشاهدات في الحزب نرجو التكرم بالعمل بالقرارت التالي ذكرها بالذوق و من دون ابداء اية اعتراضات او مشاكسات و في الهدوء و الخفة كده عالسريع السريع يا حلوين

1- بما انه حصل فيما يشبه تسونامي بوستات و فجاءة توقف فانا قررت ان احنا حنقسم طريقة نشر البوستات و حيتم كالاتي، ينشر كل مدون بوست واحد في اليوم و لا يتم نشر اي بوست بعده لمدة يومين لاعطاء الوقت الكافي لمناقشات و التداولات بين السادة الاعضاء و بين العامة من مواطنين الدولة و اذا جه عضو لا مؤاخذة يدون بوستاية و لقى زميله سبقه يبقى يكتب البوست و يسيبه في الدرافت بوكس حتى عشان لو جه عضو تالت و لقى زميله سايب درافت بوست يستنى شوية و بناءا عليه لازمنا و لابد على كل عضو انه قبل ما يعمل اي حاجة في المدونة انه يشيك البوستات و يشوف في حاجة متسابة و لا لأ

2- لما كل عضو منكم يطلع بقرارت و انا اعتمدها ميسبهاش في البوست و خلاص و بمرور الوقت يعدي عليها الوقت و تتنسى، و بناءا عليه فكل متحزبن منكوا بس اعتمدله قرارته و خططه و يتم الموافقة عليها ، يجيي بعدها و يضيف القرارت دي اذا كان ليها مكان على السايد بار أو يعملها بوكس جديد لو نفع، انا مش عاملاكوا ادمنز ببلاش كده يعني

3- العضوة بنت القمر ارجو التكرم بعمل ريدريين واحد لقراءة المدونات الاخرى والتي تكون مختصة بشؤون الاحزاب و لها علاقة بعملنا كمتحزبنين و التي سوف يستفيد السادة الاعضاء من قراءتها، انا احب اعضاء حزبي يكونوا متسأفين و متنورين، اما الريدر التاني فهو حيكون ريدر مدونتنا احنا عشان انا احطه عندي و اراقب البوستات اللي بتتنشر هنا و طبعا اي عضو تاني يحب ياخده مافيش مشكلة بس اهم شئ انه يكون ذاتي التحديث عشان منعتمدش عليكي انت و بس بشكل يدوي انك انت اللي توافقي على البوست او لا
عاوزينه توماتيكي توماتيكي.
4- يمنع منعا باتا المساس من قريب او من بعيد لاي نوع من الاديان، و ذلك لانه كما قلنا اننا حزب لا مرجعية له على الاطلاق و الدين لله و الوطن ليا و انتوا عليكوا بالناس

5-سوف يتم اعادة هيكلة وزارات الحزب و اعادة النظر في المهمات الموكلة اليكم بما ان عدد كبير من الناخبين مردوش عليا و بالتالي حتزيد الاعباء عليكوا لكن انا واثقة من حسن تصرفكم و قدرتكم على القيام بعدة مهام في وقت واحد

6-سوف تكون بعض الوزارات بدون وزير معين لكنها اما مناصفة بين شخصين لرؤيتي انهم قادرين على القيام بالمهام المنوطة بهم و احيانا اخرى هناك وزارات سوف ييكون اسمها ملتي وزير مينسرتيMWM، يعني حنكون كلنا مشتركين فيه و ده حيحصل لما حد يطلع بفكيرة و ينشرها و احنا نتلم عليها زي الدبان و تبتدي الابداعات تشتغل و ساعتها صعب نعرف مين الاب.

7- بس مافيش اي قرارات لغاية دلوقتي لكن كان لازم اوصل لرقم سبعة عشان هو رقم السعد

الله
الحزب
هلهلستان

قرارات جديدة و علي ساكني عزبة المانكيز و ارض الجنرال الامتثال

قرار رقم اتنين
قررنا نحن منع كل المظاهر البيئة في شوارع هلهلستان فقد كان الموضوع يقتصر علي الميكروباص و الأن التوك توك يحل مكانه
حتي سمي اجيال بالكامل باسم جيل الميكروباص و جيل التوك توك
و قد كان في العصر البائد عندما يريد احد الصيع أن يشعر الأخر بأن عمره في الصياعه قصير للغايه اثناء احدي النقاشات حامية الوطيس علي القهوة (حد يعرف معني وطيس ؟؟ شكلها كلمة عيب و لا ايه مش عارف !؟ ما علينا) يقول له
انت يا بني من مواليد التوك توك
انما انا من مواليد الميكروباص
و يعود بظهره الي الخلف و يرفع رأسا شامخا و يرتكز بشدة علي وطيسه لأنه من مواليد الميكروباص مش من مواليد سته الصبح ... زي مواليد التوكتوك كده
و حرصا منا علي السلام الاجتماعي و علي الوطيس بتاع كل واحد في الشارع الهليهلي و طبعا كل واحد لازم يخلي باله من وطيسه ... دي مسئوليه يا جماعه الوطيس دي
و حرصا منا علي عدم وجود هذا المنظر البيئة و لأني وزير البيئة فقد تم منع الميكروباص و التوك توك
و حرصا منا علي توفير حلول بديلة سيتم توزيع حمار حصاوي علي كل مواطن و حصة من البرسيم كل يوم صباحا علي ان يتم غسل وطيس الحمار كل يوم صباحا و ان لم يتم غسلها سيتم سحب رخصة الحمار ... و ممكن رخصة سائق الحمار كمان لو زودت في الكلام

قرار رقم واحد

بمناسبة هذا الحدث الذي لا يعلم اهل هلهلستان الكرام اي شيء عنه بتاتا

قررنا نحن وزير البيئة

قطع النور تماما في كل هلهلستان حتي نشارك قدر المستطاع في هذا الحدث العظيم

و توزيع شمعة واحدة كل يوم علي كل مواطن صالح هليهلي

قرارات هامة اصدرها السيد رئيس الوزراء و وزير البيئة و مدير حديقة الحيوانات و نائب دائرة كفر عوض السنيطة

و باشتغل علي تاكس بعد الضهر

تحيا جمهوريه هلهستان الشعبيه الجماهيريه العظمى الراسماليه على اشتراكيه بالمهلبيه وعاشت طشت الملوخية

نداء استغاثه

السيد الفاضله رئيسه الحزب

******************

الرفيقه حفصه حفظها الله

اشكو اليكي معلمتنا سوء حال البلاد وهوان هليهستان وتردي احواله الحزب بقا في التررللي يا حفصه

انا يا حفصه وزيرة شئون المرأه جت سمباتيك اخدت مني الحقيبه الوزاريه وانا دلوقت من غير حقيبه بعد ما اشتغلت عشر سنين في مسوده حقوق المرأه واهي عندك يا افندم

اولا ورغم انك اديتيها التموين

اتنين السيد رئيس البنك المركزي كل شويه يقول اربطوا الحزام اربطوا الحزام لما الكلي وجعتني وبيفكرنا بالعصر الرجعي البائد وبعدين هو بتاع بنك يصرف وخلاص اياكش نرمي التموين في البحر لا وكمان يقولك قراطيس الشاي والسكر فاكر نفسه ها يدينا شاي الشيخ الشريب بتاع زمان ولا ها يصرف لنا السكر اقماع زي التموين المصري القديم

حد والنبي يعرف يعني ايه قماع؟؟

وبعدين هو مين بتاع الماليه في هليهستان عشان ياخد القررات التنفيذيه ويفكها علينا

ويا ريت بلاش راجل عشان ميخنقناش ويقعد يقول شدوا الحزام وبكرة وبعدة وخطط خمسيه وعشريه

تالتا جيت امسح الميل بتاعي عشان التعليقات ملت الميل لقيت ميل في وسط الميلات لشخص غريب مندس اسمه مولتو وانا مش عارفه مين مولتو ده ولو انه اغلب الظن اسم سلعه من العصر العنصري البائد المهم هذا او هذة المولتو وغلب حماره عشان اعرفه ممكن يكون جاسوس للنظام المصري المنحل

وممكن يكون عضو مافيا اطلب تحقيق عاجل لاكتشاف هويه المدعو/ة مولتو المندس بين صفوف الحزب

ارجو تحديد صفات ووظائف الساده الاعضاء منعا للتداخل والمشاكل انا عاوزة الحقيبه الوزاريه بتاعتي تعليم وطفل ومرأة

الا

واخدة بالك من وإلا دي ها اشتري حقيبه تانيه جينز وبترتر اهو تنفع صبح وبعد الضهر

الرفيقه قمر فيتش

أنا الوزيـــــرة

بما اني من اعضاء الحزب الموكر و اللي لسة مش عارفة اهدافه ايه بالظبط نظرا لتضارب تصريحات السادة الزملاء و بما ان كل اللي يلحق منصب بيلهفه و قاعدة (اللي يصحى بدري يحكم) مطبقة شر تطبيق بين صفوف الرفقاء

فانا حمسك نفسي منصب جديد و وزارة جديدة نوفي و هي

وزارة المرأة

و كما نعلم يا شعبنا الهلهلستاني الحبيب فحق المرأة منهوب في وطننا المنصرم لذلك انا حبدأ معاها عصر جديد من الدلع و الفرفشة و الانبساط و ده كله حيطلع على دماغ المواطن الدكر لامؤخذه و طبعا لازم ميزان العدل يميل و نجور على حقه و في الغالب حيدور له على وطن تاني يعيش فيه بعد الايام السودة اللي حنوريهاله

اول حاجة حعملها للمرأة الهلهلستانية هو اني حنزل لها ادوات المكياج و كريمات القشف و التسلخات على البطاقة التموينية بدل الزيت و السكر و الزر و ذلك حتى تهتم بسحنتها و تعوض ما فاتها من عصور المرمطة و العماص و تسد الشروخ و الشقوق اللي نشأت في كعوبها من اثر الجري ورا لقمة العيش و نخلي حد تاني يجري بقى

ثاني حاجة حعمل مراكز تجميل على غرار مراكز الشباب في كل حي باشتراكات رمزية للاخوة النساء و استيراد مكوجية نضاف لفرد شعر الستات و سنفرة و معجنة اي مطبات حدثت بفعل سوء الاستخدام

ثالث حاجة حنوفر لها كل ما تحتاجة من متع الحياه الثابتة و المتحركة سواء كانت بالجهود الذاتية او بالكهرباء او بالعقاقير الطبية المهم في الاخر الاخوة الستات ينباسيطو

رابع حاجة يلغى الفستان و الجيب و المنطلون و تعمم الجلبيات ام سفرة و دانتيل علشان الست تقعد على راحتها و تانتخ و تطبق القاعدة الهليهلي على حق

خامس حاجة تلغى الاساتك بكل انواعها السفلية و العلوية و اللي كاتمة على مراوح الاخوة الستات منذ عصور و تعمم الدكة الويرليس لسهولة ارتداء الملابس و بلا كتمة بقى

سادس حاجة يتم استيراد عدد خمسين الف مليون ((عبده ))من البلاد الشقيقة المجاورة للعمل في البيوت لخدمة الاخوة الستات و تامين الفطور في السرير يوميا باجور زهيدة

سابع حاجة زيادة رواتب الاخوة الستات 100 %على ان يكون العمل يوم الخميس من الساعة 4 العصر و حتى 4 و ربع و باقي الاسبوع اجازة

ثامن حاجة و علشان محدش يفتكر اني بحابي الاخوة الستات و لا حاجة حلغي لهم اجازات الوضع و ساعات الرضاعة و رعاية الطفل و انقلها الى الاخوة الرجال علشان الستات تعبوا معانا كتير و جه الوقت الرجالة توضع و ترضع و تراعي العيال بقى و تفهما للحمل الملقى على كاتفهم سيتم صرف عدد خمس علب بامبرز شهريا مع التعهد باعادة الفارغ

و لسة انتم شفتم حاجة حمخمخ لكم و اجي تاني

ده انتوا حتشوفوا ايام

!!!

مع تحياتي

الست الوزيرة: كلبوزة لكن سمباتيك

قرار جديد

قرر سيادة رئيس مجلس الشعب العبقرى الآتى

رفع كلمة (يوم) بجميع مشتقاتها من مفرد ومثنى وجمع من جميع قواميس هلهلستان

استخدام كلمة (عيد) ومشتقاتها فى نفس مواضع استخدام الكلمة المبادة

يعنى لما ييجى مذيع يتكلم فى النشرة يقول انه فى يوم العاشر من فبراير سيتم كذا وكذا

يقول فى اللذيذ:إنه فى عيد العاشر من فبراير سيتم كذا وكذا

وهكذا أيها الشعب استطاع رئيس مجلس الشعب تحويل الأيام كلها إلى أعياد

هذا من أجل رفاهية الشعب العظيم وجعل أيامه كلها مجيدة من غير أى إنجازات ولا وجع دماغ

ينشر فى المدونة الرسمية

نافذ لساعته وتاريخه

تم افتكاس هذ القرار بعد قرائتنا بكل احساس مرهف لبوست وزيرة التعليم فى مدونتها الخصوصى

http://bntalkamar.blogspot.com/2008/02/blog-post_16.html

أنا

المنصب

هلهلستان

والله الموفق

اللائحة التنفيذية للاجراءات الاقتصادية الاستثنائية فى الدولة

احب اعرض اللائحة التنفيذية المقترحة لربط الاحزمة فى مواجهة الايام القادمة وما تحملة من غلاء وفقر ، وهى عبارة عن توصيات قد تصل الى حد الالزام الجبرى ومن يتعمد المخالفة يتعرض لاقصى العقوبات وادناها ان يركب حمار بالعكس ويزف فى حوارى العشوائيات وذلك لتوفير ثمن المشانق وطلقات الرصاص

اولا- يجب اعادة تدوير القمامة والنواتج الصلبة لمياه الصرف الصحى

ثانيا - الاستغناء تماما عن الاكياس البلاستيك

ثالثا - الحرص الشديد اثناء تفريغ قراطيس السكر والملح والشاى والبن والفلفل الاسود وما يماثله من بهارات فى البرطمانات بهدف منع الفاقد فى المواد التميوينية التى تعتبر بمثابة الغطاء النقدى للتجارة

رابعا -ايماء الى البند السابق يتم الغاء المبيدات الحشرية تماما لان الحشرات لن تدخل مطبخك النظيف

خامسا - الحرص الشديد عند غسل الاطباق والحلل واحتجاز اى بقايا ارز او خضار بايت لاستخدامها علف للحيوانات المعاونة فى مجال استصلاح ارض الصحراء وكذلك لتحقيق هدف عدم سد بالوعات المطابخ مما يوفر اجر السباكين اللى حيكونوا مشغولين فى توصيل مواسير نقل مياه النيل الى الصحراء

سادسا - ممنوع منعا باتا اتلاف الكتب الدراسية فى المرحلة الدراسية الالزامية والوحيدة وهى لمدة عشر سنوات فقط بدون بيبى كلاس ولا كى جي( سوف يتم اغلاق الجامعات وتعليم النوابغ فقط فى بعثات دراسية فى الهند والصين ) ويتم تسليم الكتب وهى من مادة البلاستيك الغير قابل للحريق والقابل للغسيل من طالب الى زميله فى المرحله الاقل

سابعا-توفيرا للطاقة يتم انشاء مغاسل عمومية فى الاحياء على الطراز الامريكى وكل واحدة تجيب الصابون بتاعها معاها وكمان البامية للتقميع او الملوخية للخرط اثناء الانتظار

ثامنا- التلفزيون بكامل القنوات الفضائية يشتغل من بعد صلاة العشاء ولمدة ثلاث ساعات فقط

تاسعا- كل عمارة تشترك فى شراء ميكروباظ خاص( ثمنه فى حدود 1000 بيضة نعام ) بها لتوصيل السكان الى محطات المترو وطبعا مقترح انشاء خط مترو انفاق تحت كل شارع مع ترك سطح الارض لملاعب التنس والباسكت

عاشرا- عدم زخرفة دور العبادة بالرخام والنجف الكريستال والسجاجيد العجمى والغاء كحك العيد والحاجات الصيامى والغاء اعياد الميلاد وعيد الحب مع الابقاء على عيد الام والاعياد الدينية التى يتم الاحتفال بها على سنة موسى وعيسى ومحمد بدون مبالغة وممنوع تزويق فصول المدارس بالورق الكوريشة الملون

ينشر فى الجريدة الرسمية بعد الاعتماد

المسوده العامه لحقوق المرأه الهليهستانيه.. تتبع

المسوده العامه التنفيذيه لحقوق المرأه الهليهستانيه... تتبع
**********************************
اولا:يحق لاي امرأه هليهيستانيه جميع الحقوق الدستوريه والقانونيه لاي ذكر هليهستاني
يحق لها النوم والانتخه والجلوس علي القهوة والاجازة المرضي والاعتيادي والمعاش المبكر ومكا فأه نهايه المده بعد خدمتها الاسرة الهليهستانيه
تانيا:يشارك الرجل الهليهستاني المرأه في اعمال المنزل بما فيها غسيل المواعين ودعك الحلل طبق طبق وحله حله ودعك الحمام بالديتول والكلور بالتبادل بينهما
تالتا:يمتنع الرجل الهليهستاني عن طلب الماء والشاي والنسكافيه من مراته وهي بتكلم صاحبتها اوامها في التليفون ويخدم نفسه
رابعا:يمتنع الرجل الهليهستاني عن التصنت علي مراته وهي بتكلم مامتها بصوت واطي و يروح ويجي قدامها وخصوصا لما بتكون بتشتكي منه
خامسا :لا يحق للرجل الهليهستاني طلبات العصر البائد مثل عاوز الشراب البني و وناوليني الشاحن الموبايل وحضري لي الفطار قبل واحده ظهرا
سادسا:لا يحق لاي رجل هليهستاني اجبار مراته نهائيا وكليا انه يجبر مراته تكلم امه الفاضله وتقدم للها فروض الولاء والطاعه او اخواته القرشانات تحت اي سبب ويسيبها براحته وغالبا راحتها مش هتريحه
سابعا:لا يحق له جرها الي اي زيارات طهور ابن اخوه وسبوع بنت خالته وحنه بنت عمه وكل تلك المناسبات البارده عشان هي اكيد مش طايقاهم ولا هما كمان
اي مخالف يجلد ويشوي في ميدان عام
ثامنا:توفر دوله هليهستان لكل مواطنه مصروف ايد يكفي تنقلاتها وملابسها ومكياجها
تاسعا: يوفر لها محافظ البنك المركزي لكل مواطنه هليهستانيه لاب توب شخصي بوصله دي اس ال
ذو سرعه فائقه ويمتنع الذكور عن النخورة ورا الاناث علي الكومبيوترات والايميل والحركات القرعه دي
يحق للمواطنه الهليهستانيه العمل والجلوس في اللبيت يوفر لها القانون جميع اعمال ابر الكروشيه والتريكو عاشرا:والكانفاة تلات ايام في الاسبوع لتوفر الملابس لاسرتها ولها راحه باقي الاسبوع بينما يعمل رجل هليهستان في الغيط والصيد لتوفير الاكل لاسرته

الله

هليهستان

التدوين
يتبع

الرفيقه المناضله :قمر فيتش

ملحوظه:اهلا ببقيه اقتراحاتكم للترفيه عن المرأة الهليهستانيه ولراحتها سعادتها

قرارات استبدادية

قرر رئيس مجلس الشعب التدخل بشكل سافر ومباشر فى اختصاصات محافظ البنك المركزى بشكل لا يخدم العملية الديمقراطية

وما يسمى دولة المؤسسات

الغاء التجارة

الغاء المقايضة

محدش يقول العربية بعشرين بيضة و لاحتى بيضة واحدة

مافيش حاجة بفلوس ولا حاجة قصاد حاجة

هانعمل سوبر ماركت كبير فى وسط هلهلستان

اللى عاوز حاجة يروح ياخدها

والمستغنى عن حاجة يروح يسلمها لمحافظ البنك المركزى

على محافظ البنك المركزى حصر الحاجات اللى بتجيب حاجات

زى الفراخ

ومكن تصوير المستندات

والبقر والمعيز

على محافظ البنك المركزى انه يروح يستلم الحاجات بالواحدة وبالميزان

ومينساش ياخد معاه الحاجات اللى يعوزها المواطن اللى عنده حاجة بتجيب حاجات

الغاء كلمات بيع - شراء -ايجار

من جميع قواميس هلهلستان بجميع مرادفاتها ومشتقاتها

البيت لساكنه

السيارة لراكبها

الأرض لمن يزرعها

البلوج لمن يدون

http://www.greenbookstudies.com/ar/explanation2.php

بيان من محافظ البنك المركزى لدولة هلهلستان

حيث انه قد تم المراد من رب العباد وحصلت على الاذن الموقر من الرفيقة حفصة ادام الله عزها وحيث ان هذا المنصب الخطير الا وهو محافظ البنك المركزى لم يتقدم له احد من الاخوة المدونيين الذين انصب اهتمامهم على الموزز وعلى الحقائب الوزارية وهى مناصب كما تعلمون على كف عفريت فقد هدانى الله الى احتلال منصب محافظ البنك المركزى فى الدولة
وبهذه المناسبة الجليلة فانى قررت اصدار القرارات الاتية واعرضها امام الرفيقة حفصة التى ارجو ان تبادر وبدون كسل باعتمادها ليعم الخير على الرعية ويتفرغ الناس للمهمة الجليلة التى تحفظ النوع الهلهلستانى الا وهى التناسل باكبر عدد ممكن لمواجهة النقص الخطير فى الخبرات والعقول حيث يتم اختيار الاصلح للحياة بعد مرور الشباب فى الاختبارات التى تحدد الاصلح للبقاء والعمل فى الصحراء الغربية بدون عدد والات لشق الترع من بحيرة ناصر واستصلاح ارض الصحراء وزراعتها بالقمح وكذلك حفر الارض بالاظافر للوصول الى البترول والمعادن الاخرى
قرار 1-حفاظا على الاقتصاد القومى ومنعا للتضخم، يتم الغاء العملات الورقية والمعدنية تماما من التداول ويبدأ العمل بنظام المقايضة وهذا لدعم الانتاج على مستوى الاسر بمعنى اللى ينتج سلعة يقدر يبدلها بسلعة اخرى او خدمة بمعنى اصلح السيارة بعدد 10 بيضات واخد لحمة من الجزار مقابل انى اعلم ابنه الحساب وهكذا
قرار 2 - يتم وقف استيراد اى سلعة ماعدا المستلزمات الطبية فقط
ينشر فى الجريدة الرسمية للدولة ويعمل به فور اعتماد الرفيقة حفصة

قرار هلهلستاني رقم 777

تحديث خطير جدا

ارجع ااكد لكوا اني قلت احب اعرف مين اللي حينضملنا قبل ما ينضملنا

لكني فوجئت باشخاص معزومين على البلوج

فياريت العضو الغير ملتزم بقراراتي يقولي هو مين

أولا عشان اشيله

ثانيا عشان يا ريت اعرف مين الاخوة الجداد المعزومين عندنا و ايه مدوناتهم و بعد الاطلاع على بلؤاتهم ساعتها اقر بالموافقة

ماذا والا سوف اضطر اني اسحب الادمنز منكوا لغاية ما تتكشف لي النية الصالحة في كل عضو على حدة

الله

الحزب

هلهلستان

1-كل عضو يتفضل يضيف نفسه في لسته السادة الاعضاء

انا مش بشتغل عندكوا منك له عشان افضل اجري ورا كل واحد عشان اضيفه امال انا عملاكو ادمنز ليه؟؟

اللي مش حيشتغل ادمن مظبوط حشيله من السلطة و اخليه عضو غير فعال

يعني يدوبك يكتب بوستات و يعلق و السلام و لا يقدر يزود شئ و لا يقدر يحط حاجة على مزاجه

2-تاني انا عملتكوا ادمنز عشان لما كل واحد فيكوا يمخمخ قرارات ،مش سلطة الحكاية

هو اه يمخمخ لكن يكتبها في البلوج كبوست و ينادي بقية الاعضاء من على القهوة و هما يضيفوا فيها و بعد كده ننشر

اصل مش معقولة افتح الحزب من يوم و نص الاقي ديشليون بوست

و متخافوش اكتبوا انتوا بس حتى لو كانت القرارت متعارضة مع بعضها، مين حيسال اصلا ، خلونا نفضي مخنا من الافكار اللي فيه و بعد كده يحلها حلال و نحل الحزب من اصله

3-نسيت كنت حقولوكوا ايه و ده عشان انا مش بكتب في مسودة ، انا قراراتي بستلهمها من فرجتي على عامة الشعب اللي لسه مش لاقينه

4-كل عضو هلهلي يطلع حاجة تصلح انها تكون من قواعد الحزب او من بنود دستوره يكتبها في مكانها مش بس في البوست

امال انا خليتكوا ادمنز ليه

اخيرا

احب اقولكوا اني حفضل اعايركوا بحكاية الادمنز دي لغاية ما انتوا تقولوا جاي و تستحفلوني اني اشيلها منكوا و بكده اكون حققت الديموقراطية معاكوا لكن انتوا اللي رفضتوها

اه

اسم النبي حارسني و صايني انا فتكة اوي و افوت في الحديد

دمتم

حد معترض؟

لا؟؟! طيب كويس هو ده اللي ناقص

و ها هي هلهلستان ترتفع عاليا يا ابناء هلهلستان الشرفاء

قرار قابل للتعديل

قرار رقم واحد:قرر رئيس مجلس الشعب منه لنفسه تعديل مواد الدستور بالكامل

قرار رقم اربعة :محدش من الوزرا يقدر يعين نفسه فى منصب ولا يستقيل

قرار رقم اتنين :محدش يرد على التعليقات الغريبة اللى مش من أعضاء

قرار رقم خمسة :احنا حزب يبحث عن شعب دا بند غير قابل للتعديل

قرار رقم اتنين :دولتنا عمرها ما هتبقى ديمقراطية

قرار رقم تلاتة :رئيس مجلس السعب خد معاه رئاسة الوزرا

قرار رقم سبعة :عاوز ارشح ناس لمنصب مواطن بس فى ودن رئيس المخابرات

عشان يعملهم ملفات ويحضر السجون ويرش ميه

قرار بدون رقم :توضع مشروعات وزيرة التعليم على جدول الأعمال

قرارنهائى :بنت القمر بقت وزيرة الدولة لشئون أعالى البحار وسفيرة الدولة فى ايسلندا

المسوده العامه لحقوق الطفل {الهليهستاني}.تتبع

بيان وزيرة التربيه والتعليم وشئون الطفل والمرأه

المسوده الاوليه لحقوق الطفل والطفله في هليهستان

*****************

يحق لاي طفل في هليهستان الشمس والماء والهواء منذ قدومه علي ارض دوله هليهستان

ثانيا:يمنع نهائيا استعمال اي من وسائل النظام المصري العنصري البائد من ضرب وقسوة واي طفل يتعرض لافعال قسوة او عنف او تحرش يحق له تبليغ الهيئه العليا ممثله في الوزيرة شخصيا التي سوف تقوم بتنفيذ عقوبات رادعه تتراوح بين الشنق في ميدان عام او الحرق حيا لكل من تسول له نفسه ايذاء الي طفل هليهستاني

تالتا:تمنع نهائيا مدارس النظام السابق وتتحول الي ساحات شعبيه للعب الكورة والتمتع في الشمس والهواء او حفرها لحمامات سباحه صيفا

رابعا:تستبدل مناهج التعليم السابقه بمهارات اخري ملائمه لدولتنا المسالمه وهي تعليم الصيد بالسنارة والطعم وتعليم زراعه البطاطس والفراوله والنخيل فقط

يتم تعليم الاطفال فقط حلب البقر وتربيه الماعز للحصول علي طعامهم وسد جوعهم فقط بعد بلوغ 12 سنه ميلاديه

خامسا:اي طفل هليهستاني يتخلف في تعلم مهارة الصيد يستبدلها بمهارة اخري ويتم نهائيا وبصورة ابديه الغاء نظم التعليم البائده التيرم والميد تيرم

اي ولي امر طفل او طفله في ارض هليهيستان يظبط يعلم ابنه مواد النظام السابق يتم سلخ راسه حيا

فاللغه يتعلمها الطفل من ابويه والحساب لا حاجه له لان نظامنا الاقتصادي ها يكون قائم علي المقايضه

والفيزيا والكيميا هي مواد خبيثه هدفها اذكاء الحروب وصنع القنابل

سادسا:يحق لاي طفل هليهستاني فتح تلاجه اسرته والحصول علي ما يشاء من اطعمه وحلويات وجاتوة بأي كميه واي وقت

سابعا: يحق لاطفال هليهستانالمشي حفاه او ترك افرازات انوفهم منسدله بدون توجيه لوم او عقاب لهم لانها صورة طبيعيه من صور الطفوله

ثامنا: يحق لاطفال هليهستان بعد الغاء نظام التلفزيون النتخلف والدش والرسيفر والاتاري من صور التخلف في النظام البائد الحصول علي اله موسيقيه وكراسه رسم والوان وكورة شراب توفرها له دوله هليهستان من سن الخامسه علي مسئوليه ابويه

تاسعا:يتم اقامه شاشات كبيرة حكوميه لاطفال الدوله تعرض افلام اسماعيل يس ونجيب الريحاني

كآثار سابقه

اي مخالفه للوائح الطفل الهليهستاني يتم التصدي لها بصورة فوريه ورادعه وبلا رحمه

بنت القمر وزيرة شئون التربيه والتعليم والطفل والمرأه

يتبع

قرارات هلهستانية مخابراتية عاجلة

بما أنى و الحمد الله نلت ثقة الريسة الغالية و تم تعيينى مديرا للمخابرات الهلهلستانية المفتحة اوى فأننىأعلن القرارات الآتية التى جاءت بعد فحص و بحث و تحميص (تحميص دى جاية نتيجة أننا ادارة المخابرات الهلهستانية أصلا مقرها جوة فرن بلدى فى الحى العاشر) و قد جاءت جميعها لراحة و دلع المواطن الهلهستانى البسيط المهاود مخروم الدخل و قلنا نلحق ننشرها قبل ما الريسة ترفدنا من مناصبنا:ء

بند(1) يتم كتابة جميع قرارات و مكاتبات الحكومة الهلهلستاينة بالحبر السرى و بالشفرة حفاظا على صحة الشعب الهلهستانى و ده طبعا طبقا لأحدث الأبحاث العلمية المعملية الفذة اللى أثبتت أن الفهم بيقصر العمر و مفيش أحسن من طاعة ولى الأمر

بند(2) بما أنه بم يتم الحصول على شعب هلسهتانى لحد دلوقتى فيتم تعطيل بند واحد لحد ما نلاقى شعب و نذله

بند (3) تساهم أجهزة المخابرات الهلهستانية مع بقية أجهزة الحكومة فى البحث عن شعب لدولة هلهستان و من جهتنا قمنا بتأجير منادى سيارات سابق تم تدريبه على أحدث وسائل المخابرات و التجسس الحديثة الواردة فى أفلام جيمس بوند و رجل المستحيل و ما وراء الطبيعة ليقوم بعمل جولة فى دول المنطقة و العالم (و بدلات السفر النص بالنص طبعا) للبحث عن شعب يصلح للحكم الهلهستانى العالى قوى

بند (4)تضطلع (حلوة تضطلع دى ) المخابرات الهلهستانية المفتحة اوى بالتعاون مع أجهزة الإعلام العالمية ام بى سى 3 و سبيس تون لنشر المبادئ الهلستانية العليا والسفلى و اللى على جنب بين دول و شعوب المنطقة حتى نصل للحلم الهلهستانى العظيم بقيام اتحاد الدول الهلهستانية المتين من الخليج الحائر حتى المحيط اللى نايم بدرى

وقد تم اعتماد الشعارات الآتية للحملة العالمية (اشترى حكومة هلهستانية و أحصل على الأخرى مجانا) (عندنا كل مسئول بيمسك كذا منصب و بكدة السرقة أكيد حتقل ... ليه تتسرق أكتر لما ممكن تتسرق اقل)

و فى النهاية نعلن نحن مدير المخابرات و صاحب فرن العيش اللى فى الحى العاشر أن الإشاعات المغرضة عن قيام انقلاب هلهستانى ضد الرئيسة المحبوبة حفصة ليس لها أساس من الصحة مطلقا بتاتا فتاتا لأن الختم اللى بنختم بيه قرارات الانقلاب انا أصلا مخبيه فى حتة أمان و نحن على العهد باقون لحد ما نلاقى حد بيدفع عمولات اكتر

تحيا جمهوريه هلهستان الشعبيه الجماهيريه العظمى الراسماليه على اشتراكيه بالمهلبيه وعاشت طشت الملوخية

انقلاب رقم واحد

من المبدأ الاشتراكي الرأسمالي المتوازي نحو التشكيل المنطقي للوعي الجماهيري

ومن موقف احمد حلمي

وحيث ان اللي يصحى بدري يحكم

اعلن أنا محمد ابو شنب تعييني في المناصب الاتية

منصب رقم واحد

أنا الشعب في احشائه الغلب كامن

منصب رقم اتنين

كبير حرس غيطان الملوخية

منصب رقم تلاته

وزير قرطفة عيدان الملوخية

منصب رقم اربعة

تباع ميكروباص خط مساكن عين شمس المطرية الصبحية ووزيرا للنقل من اتناشر لاربعة

منصب رقم خمسة

مسئول العلاقات بين مصر والصعيد وحبيبي قلبه سافر وانت قلبك حديد بعيد عني بعيد من مصر للصعيد

منصب رقم ستة وسبعة

غرفتين وصالة اتنين مطبخ وحمام للايجار قانون جديد

الله

الوطن

جوجل

التشكيلة الهلهلستانية الاولى

دي كانت اول تشكيلة هلهلستانية

تقدروا تشوفوها هنا

لكن بما ان كتير معبرونيش فانا حغيرهم و قريبا

فاللي يحب يرشح نفسه لوظيفة من دول يتقدم و احنا نشوف اذا ينفع ولا لأ

و كمان ممكن يتشرح حد من اعضاء الحزب نفسه

و بكده احب ازف اليكوا بشرى ان كل عضو ممكن يمسك ما لا يقل على خمس مواقع مختلفة و مش أكتر من سبعة

و قرار تاني موجهة للاعضاء

مش معنى انكوا ادمينستراتورز يعني تعزموا كلشن كان على الحزب

مافيش حد يتعين من غير موافقة الرئيس الحزبي للحزب اللي هو انا طبعا

حد ممانع؟

لأ!!؟؟ طيب كويس

اهو ده اللي ناقص

تامر حسني رمز للشاب الهلهلستاني الكويس

بعد تعليقه الشهير علي انه من يهاجم حفلاته يقف ضد مصلحة مصر ... قررنا نحن حزب و حكومة دولة هلهلستان الشعبيه الجماهيريه العظمى الراسماليه على اشتراكيه بالمهلبيه وعاشت طشت الملوخية

قررنا نحن جعله رمزا و قدوة لكل شاب مصري بيحاول يبقي كويس

مش بتحب تامر ... يبقي انت ... مش كويس

هذا هو شعار المرحلة القادمة

و لتحيا جمهوريه هلهستان الشعبيه الجماهيريه العظمى الراسماليه على اشتراكيه بالمهلبيه وعاشت طشت الملوخية

انتوك شخصيا

رئيس وزراء دولة هلهلستان و وزير البيئة و مدير حديقة الحيوانات و عضو مجلس الشعب عن دائرة كفر عوض السنيطة

و باشتغل بعد الضهر علي تاكس

تعديلات دستورية على إعلان الجمهورية

يفيد سيادة رئيس مجلس الشعب ومحافظ أسيوط وسفير هلهلستان فى كولومبيا إنه عمل تعديلات جوهرية وأساسية فى مبادىء دولة المنفى

تعديل رقم واحد :نظام الحكم ليس رأسماليا ولا جماهيريا ولا اشتراكيا .هو نظام وخلاص

رقم اتنين:لا تعير حكومتنا أى اهتمام للشعب حيث أنها حكومة بلا شعب

تعديل رقم تلاتة :جارى البحث عن شعب حيث أننا كلنا وزراء ومسئولين كبار

رقم أربعة :لإعلان الحصول على شعب يكفى مواطن واحد

تعديل رقم خمسة :المواطن اللى يقبل الشروط السابقة هايتنفخ

المسودة الاولي للدستور

:التعريف بالحزب

حزب ذو شكل تكعيبي اولي الخلية و احادي المعطيات غير معلوم الاهداف و لا مرجعية له على الاطلاق

:رمز الحزب

ايد المقشة

البند الاول :اتكلم زي ما تتكلم ... من حقك تتكلم .. اتكلم يا حبيبي .. ما تسكتش .. ارغي يا امور

البند الثاني : دولة هلهلستان ، عاصمتها سبهللستان و تقع في افريسيا على بعد محطتين ميكروباز من اول ترعة المريوطية تقاطعا مع اول شارع المطار سكة اللي يروح ميرجعش ، و من اهم مدنها قرية الطناش كفر الاتكالية،مركز بير قمع

البند الثالث :نظامها هو النظام الشعبي الجماهيري الرأسمالي الاشتراكي علي ما تفرج و حسب الظروف ... يوفر مرونة في التعامل و جفاف دائم

البند الرابع : اللي فوقك لازم تبوسه و اللي تحتك طبعا دوسه

البند الخامس : نحن لا تناسبنا الديمقراطيات الغربية ... لأن الديمقراطية هي الاحزاب ... و الاحزاب تعني القبائل و ان وافقنا عي هذا النظام القبلي ... قد تحدث حرب اهليه بسبب تلك الاحزاب قبايل يعني يخشوا الزرايب يقتلوا الابقار ... النظام الجماهيري الشعبي هو الافضل ...كل الشعب في السلطة ... كل الجماهير

البند السادس : يحق لكل من رئيس الجمهورية او السادة الوزراء تغيير الدستور في اي وقت و دون اخطار اي احد و خد بالك احنا علي طريق و ماشيين علي هوا يا اسطي

البند قبل الاخير : مش كل دولة اللي تتاخد جنسيتها

البند الاخير:دولة هلهلستان الناشئة دولة حضارة الفوضى اللا محدودة والسلطة اللا موجودة واللي يحب النبي يزق

شعارنا

تحيا جمهوريه هلهستان الشعبيه الجماهيريه العظمى الراسماليه على اشتراكيه بالمهلبيه وعاشت طشت الملوخية