في وصف الدولة

دولة هلهلستان ، عاصمتها سبهللستان و تقع في افريسيا على بعد محطتين ميكروباز من اول ترعة المريوطية تقاطعا مع اول شارع المطار سكة اللي يروح ميرجعش ، و من اهم مدنها قرية الطناش كفر الاتكالية،مركز بير قمع

في وصف الحزب

حزب ذو شكل تكعيبي ... اولي الخلية ... احادي المعطيات ... غير معلوم الاهداف ... و لا مرجعية له على الاطلاق

الثلاثاء، 19 فبراير، 2008

أنا الوزيـــــرة



بما اني من اعضاء الحزب الموكر و اللي لسة مش عارفة اهدافه ايه بالظبط نظرا لتضارب تصريحات السادة الزملاء و بما ان كل اللي يلحق منصب بيلهفه و قاعدة (اللي يصحى بدري يحكم) مطبقة شر تطبيق بين صفوف الرفقاء


فانا حمسك نفسي منصب جديد و وزارة جديدة نوفي و هي
وزارة المرأة


و كما نعلم يا شعبنا الهلهلستاني الحبيب فحق المرأة منهوب في وطننا المنصرم لذلك انا حبدأ معاها عصر جديد من الدلع و الفرفشة و الانبساط و ده كله حيطلع على دماغ المواطن الدكر لامؤخذه و طبعا لازم ميزان العدل يميل و نجور على حقه و في الغالب حيدور له على وطن تاني يعيش فيه بعد الايام السودة اللي حنوريهاله




اول حاجة حعملها للمرأة الهلهلستانية هو اني حنزل لها ادوات المكياج و كريمات القشف و التسلخات على البطاقة التموينية بدل الزيت و السكر و الزر و ذلك حتى تهتم بسحنتها و تعوض ما فاتها من عصور المرمطة و العماص و تسد الشروخ و الشقوق اللي نشأت في كعوبها من اثر الجري ورا لقمة العيش و نخلي حد تاني يجري بقى


ثاني حاجة حعمل مراكز تجميل على غرار مراكز الشباب في كل حي باشتراكات رمزية للاخوة النساء و استيراد مكوجية نضاف لفرد شعر الستات و سنفرة و معجنة اي مطبات حدثت بفعل سوء الاستخدام


ثالث حاجة حنوفر لها كل ما تحتاجة من متع الحياه الثابتة و المتحركة سواء كانت بالجهود الذاتية او بالكهرباء او بالعقاقير الطبية المهم في الاخر الاخوة الستات ينباسيطو


رابع حاجة يلغى الفستان و الجيب و المنطلون و تعمم الجلبيات ام سفرة و دانتيل علشان الست تقعد على راحتها و تانتخ و تطبق القاعدة الهليهلي على حق


خامس حاجة تلغى الاساتك بكل انواعها السفلية و العلوية و اللي كاتمة على مراوح الاخوة الستات منذ عصور و تعمم الدكة الويرليس لسهولة ارتداء الملابس و بلا كتمة بقى


سادس حاجة يتم استيراد عدد خمسين الف مليون ((عبده ))من البلاد الشقيقة المجاورة للعمل في البيوت لخدمة الاخوة الستات و تامين الفطور في السرير يوميا باجور زهيدة


سابع حاجة زيادة رواتب الاخوة الستات 100 %على ان يكون العمل يوم الخميس من الساعة 4 العصر و حتى 4 و ربع و باقي الاسبوع اجازة


ثامن حاجة و علشان محدش يفتكر اني بحابي الاخوة الستات و لا حاجة حلغي لهم اجازات الوضع و ساعات الرضاعة و رعاية الطفل و انقلها الى الاخوة الرجال علشان الستات تعبوا معانا كتير و جه الوقت الرجالة توضع و ترضع و تراعي العيال بقى و تفهما للحمل الملقى على كاتفهم سيتم صرف عدد خمس علب بامبرز شهريا مع التعهد باعادة الفارغ


و لسة انتم شفتم حاجة حمخمخ لكم و اجي تاني

ده انتوا حتشوفوا ايام


!!!

مع تحياتي

الست الوزيرة: كلبوزة لكن سمباتيك

هناك 4 تعليقات:

راجى يقول...

سيادة الوزيرة
اشكرك على التوفير فى البنود المعلنة من الاجندة النسائية خصوصا بند مرتجع البامبرز علشان نظام المخازن ما يختلش بس الراجل اللى يرجع بامبرز مستعمل لازم الست هى اللى تاخده فم على طشت الغسيل اولا ولا عاوزة المخازن ريحتها تطلع؟
واشكرك على التوفير فى الاساتك فى هدوم الستات فده حيخلى الهدوم تهفهف وترجع تطير وهى دى الشفافية الحكيكية
ثالثا بند الترفيه ومتع الحياة الثابتة والمتحركة للاخوات الحريم يعنى تبع ما تم توضيحه من قبل السيد الموقر علاء الاسوانى فى شيكاجو ولا ايه الموضوع ؟ ارجو التوضيح لان ده له اثر مباشر على البورصة فى الدولة
كمان موضوع العبيد اللى هما برضو حريم ممكن يتم توصيفهم فى بند ملك اليمين للدكور فى الدولة ؟
دمتم لنا سيادة الوزيرة

HafSSa يقول...

تم الاعتماد سيدتي الفاضلة

الله
الحزب
هلهلستان

Sampateek يقول...

الاخ المجاهد راجي
مش فاهمة سيادتك الست تاخد الراجل فمين ازاي يعني و بعدين المرتجع عليه رهن و الا مش حنبيع بيبسي تاني
احنا احلينا الدكة محل الاستك سيادتك يعني مفيش لا هفهفة و لا حاجة و ابقة فكرني اخزق عنين الاخوة الرجال قبل تنفيذ المشروع ده
موضوع توفير متع الحياة مش عيزاه يتفهم غلط و مناقشته لازم تتم في جلسة مغلقة
لا لا العبيد مش حريم حضرتك العبيد اسمهم عبده و لازم يكونوا سود ميتاليك

و اخيرا نواياك مودياك الدور العاشر في مجمع التحرير و خلي بالك البوكس مبيدخولش بضهره في الجونينة دي

دمتم لنا و ماله

الاخت المجاهدة الرئيسة المناضلة المؤسسة حفصة ادام الله بقائها
هاي هو
نسيت كنت حقول اية
اه شكرا يا جميل على الاعتماد
الا بيني و بينك كده الاعتماد ده فيه فلوس و لا اورديحي؟
قبلاتشي

سي يو

entrümpelung wien يقول...

شكرا لكم .. دائما موفقين ..::))


entrümpelung
entrümpelung
entrümpelung wien