في وصف الدولة

دولة هلهلستان ، عاصمتها سبهللستان و تقع في افريسيا على بعد محطتين ميكروباز من اول ترعة المريوطية تقاطعا مع اول شارع المطار سكة اللي يروح ميرجعش ، و من اهم مدنها قرية الطناش كفر الاتكالية،مركز بير قمع

في وصف الحزب

حزب ذو شكل تكعيبي ... اولي الخلية ... احادي المعطيات ... غير معلوم الاهداف ... و لا مرجعية له على الاطلاق

الاثنين، 18 فبراير، 2008

المسوده العامه لحقوق المرأه الهليهستانيه.. تتبع


المسوده العامه التنفيذيه لحقوق المرأه الهليهستانيه... تتبع
**********************************
اولا:يحق لاي امرأه هليهيستانيه جميع الحقوق الدستوريه والقانونيه لاي ذكر هليهستاني
يحق لها النوم والانتخه والجلوس علي القهوة والاجازة المرضي والاعتيادي والمعاش المبكر ومكا فأه نهايه المده بعد خدمتها الاسرة الهليهستانيه
تانيا:يشارك الرجل الهليهستاني المرأه في اعمال المنزل بما فيها غسيل المواعين ودعك الحلل طبق طبق وحله حله ودعك الحمام بالديتول والكلور بالتبادل بينهما
تالتا:يمتنع الرجل الهليهستاني عن طلب الماء والشاي والنسكافيه من مراته وهي بتكلم صاحبتها اوامها في التليفون ويخدم نفسه
رابعا:يمتنع الرجل الهليهستاني عن التصنت علي مراته وهي بتكلم مامتها بصوت واطي و يروح ويجي قدامها وخصوصا لما بتكون بتشتكي منه
خامسا :لا يحق للرجل الهليهستاني طلبات العصر البائد مثل عاوز الشراب البني و وناوليني الشاحن الموبايل وحضري لي الفطار قبل واحده ظهرا
سادسا:لا يحق لاي رجل هليهستاني اجبار مراته نهائيا وكليا انه يجبر مراته تكلم امه الفاضله وتقدم للها فروض الولاء والطاعه او اخواته القرشانات تحت اي سبب ويسيبها براحته وغالبا راحتها مش هتريحه
سابعا:لا يحق له جرها الي اي زيارات طهور ابن اخوه وسبوع بنت خالته وحنه بنت عمه وكل تلك المناسبات البارده عشان هي اكيد مش طايقاهم ولا هما كمان
اي مخالف يجلد ويشوي في ميدان عام
ثامنا:توفر دوله هليهستان لكل مواطنه مصروف ايد يكفي تنقلاتها وملابسها ومكياجها
تاسعا: يوفر لها محافظ البنك المركزي لكل مواطنه هليهستانيه لاب توب شخصي بوصله دي اس ال
ذو سرعه فائقه ويمتنع الذكور عن النخورة ورا الاناث علي الكومبيوترات والايميل والحركات القرعه دي
يحق للمواطنه الهليهستانيه العمل والجلوس في اللبيت يوفر لها القانون جميع اعمال ابر الكروشيه والتريكو عاشرا:والكانفاة تلات ايام في الاسبوع لتوفر الملابس لاسرتها ولها راحه باقي الاسبوع بينما يعمل رجل هليهستان في الغيط والصيد لتوفير الاكل لاسرته
الله
هليهستان
التدوين
يتبع
الرفيقه المناضله :قمر فيتش
ملحوظه:اهلا ببقيه اقتراحاتكم للترفيه عن المرأة الهليهستانيه ولراحتها سعادتها

هناك 7 تعليقات:

karakib يقول...

سيادة الوزيرة
يتم تطبيق كل قرارات سعادتك
يعتمد مبلغ مالي عبارة عن 35 قرش لتنفيذ قرارتك دي

راجى يقول...

ياجماعة ارجو الالتزام ، لا وجود للعملة بانواعها فى الدولة
واوافق على صرف لاب توب لكل مواطن يقدر يمحى امية عشرين شخص خلال عام ووصلة الدى اس ال بعد محو امية عشرين اخرين
وبعدين مافيش تليفونات كده عمال على بطال لازم تقدم للمواطنين حاجة عينية مقابل الفاتورة
وطبعا الكروشية والكانافاه والايتامين والسيرما وما الى ذلك ممنوع فى الدولة كله حيروح الصحراء يبقى فيى حفر وردم ونقل اتربة ولم دودة وغزل على النول اليدوى وحلب بقر ومعيز ورعاية الفراخ والبط
عاوزين نفوق بقى ونشتغل عشان نأكل العيال من عرق جبيننا

HafSSa يقول...

ايوة كده يا قمر
هي دي البنود ولا بلاش
اديني في الشكرمون و انا احبك يا نناننص
مع تحياتي محمود عبدالعزيز

الله
الحزب
هلهستان

karakib يقول...

الكلام ده مش علينا يا معالي الوزير
الكلام ده علي الشعب
و احنا بنتعب في شغلنا
فلازم نستريح علشان نعرف ندي
___
و ادي يا باشا ادي

HafSSa يقول...

اضيف
ان كل مواطنة هلهلية من حقها الاتي
اولا: من حقها انها تدي جنسيتها لولادها لو ابوهم مش من هلهلستان
زيها زي الراجل بالظبط

ثانيا: من حقها انها تاخد اجازة وضع و رضاعة لمدة سنتين مع صرف مرتبها الاساسي طوال هذه الفترة و اذا لم تقدر على مفارقة الطفل فيتم تصريف مرتب مالي لها من وزارة الشؤون الجتماعية لكن يتم تصريفها من العمل حتى تعطى فرصة لمواطن تاني في العمل الشريف

ثالثا: قرار مبني على ثانيا، اذا مرتب الاب اصغر من مرتب الام ممكن هو اللي ياخد اجازة الرضاعة و الوضع لمدة سنتين حتى يتم ايجاد حل للطفل و تربيته مع احتفاظ الاب بمرتبه الاساسي و عدم حرمانه من الترقيات اذا كان مؤهلا لها بالفعل


رابعا: يتم تغيير نظام التلعيم الى نزام تعليمي زي المانيا بالظبط ولا يحق لاي شخص العمل الا في غير تخصصه و لا يعلم الا اذا حصل و علق شهادة تخصصه
و هذا يشمل من اول النجار و الميكانيكي
الى الدكتور
مافيش سبهللهة
ما هو دا اللي مودينا لورا


خامسا: يتم تعيين بوليس و ينتشر في ارجاء الدولة الهلهستانية العظيمة لحماية امن الافراد و المؤسسات
و من حق الشخص المتواجد وقتها في اتخاذ الاجراء المناسب لمنع اي ضرر قد يقع على ان تكون العقوبة مناسبه للفعلا
و اذا تم نوع من المبالغة فلن من حق المواطن التبيلغ الفوري و ميخافش احنا حاطين كاميرات في كل عامود كهربا


كفاية لغاية هان عشان انا تعبت
طول الليل سهرانة بفكر في الشعب و الدولة و ازاي اظبطهم


الله
الحزب
هلهلستان

DantY ElMasrY يقول...

تانى هاتقولولى مرتبات وفلوس وكلام فارغ
اصلا المواطن الهلهلستانى بيشتغل عشا يحقق ذاته
واحتياجاته مضمونة من محافظ البنك المركزى ومش هاسمحله يعمل تسعيرة لأى حاجة يعنى اللى عاوزة لاب توب ودى اس ال يجيبهولها من غير ما يقول روحى على ابص كام واحد الهيروغليفى او أى شروط من دماغه
احنا عندنا القوانين بدون لايحة تنفيذية يا سيادة محافظ البنك

DantY ElMasrY يقول...

بالنسبة لحقوق النساء انا عاوز اضيف حاجة مهمة اوى
من حق أى امرأة انها تظبط هدومها فى الشارع وتهرش فى اى حتة من جسمها زى أى راجل بالظبط