في وصف الدولة

دولة هلهلستان ، عاصمتها سبهللستان و تقع في افريسيا على بعد محطتين ميكروباز من اول ترعة المريوطية تقاطعا مع اول شارع المطار سكة اللي يروح ميرجعش ، و من اهم مدنها قرية الطناش كفر الاتكالية،مركز بير قمع

في وصف الحزب

حزب ذو شكل تكعيبي ... اولي الخلية ... احادي المعطيات ... غير معلوم الاهداف ... و لا مرجعية له على الاطلاق

الاثنين، 18 فبراير 2008

اللائحة التنفيذية للاجراءات الاقتصادية الاستثنائية فى الدولة


احب اعرض اللائحة التنفيذية المقترحة لربط الاحزمة فى مواجهة الايام القادمة وما تحملة من غلاء وفقر ، وهى عبارة عن توصيات قد تصل الى حد الالزام الجبرى ومن يتعمد المخالفة يتعرض لاقصى العقوبات وادناها ان يركب حمار بالعكس ويزف فى حوارى العشوائيات وذلك لتوفير ثمن المشانق وطلقات الرصاص

اولا- يجب اعادة تدوير القمامة والنواتج الصلبة لمياه الصرف الصحى

ثانيا - الاستغناء تماما عن الاكياس البلاستيك

ثالثا - الحرص الشديد اثناء تفريغ قراطيس السكر والملح والشاى والبن والفلفل الاسود وما يماثله من بهارات فى البرطمانات بهدف منع الفاقد فى المواد التميوينية التى تعتبر بمثابة الغطاء النقدى للتجارة

رابعا -ايماء الى البند السابق يتم الغاء المبيدات الحشرية تماما لان الحشرات لن تدخل مطبخك النظيف

خامسا - الحرص الشديد عند غسل الاطباق والحلل واحتجاز اى بقايا ارز او خضار بايت لاستخدامها علف للحيوانات المعاونة فى مجال استصلاح ارض الصحراء وكذلك لتحقيق هدف عدم سد بالوعات المطابخ مما يوفر اجر السباكين اللى حيكونوا مشغولين فى توصيل مواسير نقل مياه النيل الى الصحراء

سادسا - ممنوع منعا باتا اتلاف الكتب الدراسية فى المرحلة الدراسية الالزامية والوحيدة وهى لمدة عشر سنوات فقط بدون بيبى كلاس ولا كى جي( سوف يتم اغلاق الجامعات وتعليم النوابغ فقط فى بعثات دراسية فى الهند والصين ) ويتم تسليم الكتب وهى من مادة البلاستيك الغير قابل للحريق والقابل للغسيل من طالب الى زميله فى المرحله الاقل

سابعا-توفيرا للطاقة يتم انشاء مغاسل عمومية فى الاحياء على الطراز الامريكى وكل واحدة تجيب الصابون بتاعها معاها وكمان البامية للتقميع او الملوخية للخرط اثناء الانتظار

ثامنا- التلفزيون بكامل القنوات الفضائية يشتغل من بعد صلاة العشاء ولمدة ثلاث ساعات فقط

تاسعا- كل عمارة تشترك فى شراء ميكروباظ خاص( ثمنه فى حدود 1000 بيضة نعام ) بها لتوصيل السكان الى محطات المترو وطبعا مقترح انشاء خط مترو انفاق تحت كل شارع مع ترك سطح الارض لملاعب التنس والباسكت

عاشرا- عدم زخرفة دور العبادة بالرخام والنجف الكريستال والسجاجيد العجمى والغاء كحك العيد والحاجات الصيامى والغاء اعياد الميلاد وعيد الحب مع الابقاء على عيد الام والاعياد الدينية التى يتم الاحتفال بها على سنة موسى وعيسى ومحمد بدون مبالغة وممنوع تزويق فصول المدارس بالورق الكوريشة الملون

ينشر فى الجريدة الرسمية بعد الاعتماد

هناك 16 تعليقًا:

انحلت سيور العربه وسقط المهر من الاعياء يقول...

لا بقا يا استاذ راجى كله الا كحك العيد
كل الا الطقوس دى انا كمواطن ف الدوله ارفض المساس بتقاليد وعادات هلهلستان العظمى خصوصا فى مثل هذه الاشياء التى هى ف الاصل التراث الحضارى الذى قام عليه البعد الحضارى للدوله
كدا هلهلستان مش هيكون لها طعمبعد ما كانت بالسكر الناعم

........
تحياتى لحضرتك

بنت القمر يقول...

راجي
بقولك يا عم تخيل المدينه الفاضله
انت تخيلت معتقل ابو زعبل؟؟
اعوذ بالله وكمان تقشف يعني لغينا الفلوس وبرضه ها تأربطوها علينا ؟؟
يا ساتر علي دول رجاله؟؟
فكوها خلي ربنا يفكها عليكم!! وبعدين انت مالك ومال التعليم؟؟
انت بتاع بنك مركزي
ملكش دعوة خالص بالتعليم مقريتش المسوده بتاعه حقوق الطفل؟؟
سيبولي العيال انا ها اربيهم بطريقتي
كورة شراب شتاءا وبيسن صيف
وبعدين انا حاسه انك مرتشي!! اه بصراحه وديت فلوس هليهستان فين يا راجي؟؟
خفضت الفايده وطلعت محصول السفندي ضمنات قروض لقرايبك رجال الاعمال
ايدك اتمدت علي قوت الغلابه يا راجي
محاكمه عسكريه فورا!! انصبوا المشانق لسارق قوت المطحونين
قمر فيتش وزيرة التربيه والتعليم والمرأة
الله
هليهيستان
التدوين

^ H@fSS@^ يقول...

تم اعتماد بعض البنود و الباقي تحت الدراسة لوجود شكوك في ايجابية نية المنتج
الله
الحزب
هلهلستان

karakib يقول...

تمام التمام يا باشا
ايه اخبار الورق الاخضر (الدولارات) اللي عندك اللي مالوش لازمة دلوقتي ؟؟ في شركة اسباني عرضت تخلصنا منه تماما و بدون مقابل بدل ما هو مكدس كده في الخزن مالوش لازمة
ايه رأيك ... علي فكرة انا مالك الشركة الاسباني بس ما تقولش لحد
و هابقي اشوفك بشوية ورق برضه و ما تخافش كل شيء هيتم قدام الناس كلها
و اهه ... كله لخير هلهلستان العظمي
-------------------

تحيا جمهوريه هلهستان الشعبيه الجماهيريه العظمى الراسماليه على اشتراكيه بالمهلبيه وعاشت طشت الملوخية

^ H@fSS@^ يقول...

اوافق على البنود رقم
اولا و ثانيا و رابعاو خامسا و سادسا

لكن سابعا دي فيها كلام لان نظام الغسل الجماعي في مغاسل عمومية يؤدي لنشر امراض جلدية و شعور مقرف اني لبسي مكان غسالة واحدة قبلي
انا جربتها و لا انصح باستعمالها
اذن غير موافقة عليه


ثامنا
التي في بالعكس
يفضل مفتوح طول اليوم و قنوات من جميع انحاء العالم عشان الشعب يتفرج عليها و يحمد ربنا على النعمة اللي هو فيها
و هو مواطن عندنا في هلهلستان و يكفي ان نكسة 67 كان ممكن تلافيها او تلافي الوسكة الشعورية التي اصبنا بيها لو كان عندنا دش و اذاع لنا انباء الهزيمة بدل ما يتكذب علينا و نكتشف الحقيقة المرة و ننهار معنويا كده


تاسعا
كل مواطن من حقه شرا عربية و اذا مش عاوز يسوق يحق له اشتراك مخفض للربع في اي وسيلة مواصلات تريحه
اه
احنا عاوزين الناس متحسش بضغط في المواصلات
عاوزة وزارة للمواصلات تتالف فورا و يتم بناء جميع المواصلات و على احدث طراز لخدمة الشعب على اكمل وجه و اهم بند فيها انه مافيهاش تكاسي او ميكروبازات تمشي كده هلهلي
لا كله بمواعيد و بمواقف مخصصة و يتم اختيار نوعيات ذات طراز واحد لخدمة الشعب
احنا هلهلستان صحيح لكن حاجتنا مش حتكون هلهلية
يتم ذلك بالتعاون مع اي هيشة مواصلات المانية او على الاقل امريكية و ممكن صينية كمان
ناخد منهم النظام لكن مندفعش فلوسه


عاشرا
يتم زخرفة دور البعادة بالمعقول من دون مبالغة او نقصان
مع الاهتمام بفانوس رمضان و كرانيش العيد و رمضان و ما يكافئهم من زينة واجبة في اعياد المواطنين الاخرين


اما ثالثا دي فاصلا انا مستغربة ليه نشتري في قراطيس اذا كان ممكن نشتري بالكيلو
ما احنا قلنا حنزهزه و القاشية معدن
ليه التقشف و نظام الجمعيات التعاونية الملئ بالثقوب و المخالفات في حقوق الانسان


تم اعتماد ما سبق شرحه
و الله الموفق
الله
الحزب
هلهلستان

عين فى الجنة يقول...

يا جماعة احنا بنمر بمرحلة منيلة بنيلة يا تربطوا الحزام والعيال لما تكبر يبقى عندها امل يا اما كورة شراب وبيسين وكحك بالسكر
وبعدين وزيرة التعليم هى اللى اقترحت نظام المقايضة وانا وافقت عليه ومشى فى الدولة حنحمرء؟ لو حنحمرء نبقى نشوف الموزز اخبارها ايه ونصرف الورق الاخضر ونجيب ضرفها
ارجو ان تتدخل الرفيقة حفصة لفرض القبضة الحديدية على الوزراء واعضاء مجلس الشعب

^ H@fSS@^ يقول...

طبعا اتدخل بس افهم الاول
ايه المشكلة
انا مش عارفة اشوفها كويس


الله
الحزب
هلهلستان

عين فى الجنة يقول...

الرفيقة حفصة
ماشى نجيب ديتول مجانا بعد كل غسلة
والميكروباظ احدث طراز مملوك لكل عمارة لمنع زحمة الشوارع
القراطيس علشان منعنا الاكياس البلاستيك
وكمان القراطيس من باب شدوا الحزام والقرطاس بعد ما يفضى وبكل دقة ينفع يتعمل صاروخ لعبة للاطفال
شدووووووووووووووواااااااا الحزام

^ H@fSS@^ يقول...

لا مش بينفع بعد فترة
هي كل عليه عندها غسالة و خلاص
و الميكروبازات على احدث طراز لكن احنا مش حنجبر الناس انها تركب كلها ميكروبازات
نحن دولة اختيار لا احتيار

تحياتي

كلبوزة لكن سمباتيك يقول...

اولا اعتقد اننا مش محتاجين ندور نواتج الصرف الصحي الصلبة لانها في الغالب بتبقى مدورة جاهزة
ثانيا لا غنى عن الاكياس البلاستك لكل زوجة شاطرة من باب ارهاب الزوج
ثالثا انا الغطاء النقدي بتاعي ضايع من شهر و بحط بداله صفيحة
رابعا انا لا استطيع الاستغناء عن المبيدات الحشرية لانها تعمل كمزيل عرق هايل و لا كمان حتستغنوا عن العرق و نح بداله مية طرشي
خامسا انا مليش فيها علشان جوزي هو اللي بيغسل المواعين و لو عايزاني اخليه يلم الرز رزاية رزاية معنديش مانع
سادسا انتم يوم تقولوا لغيتوا التعليم و يوم تقولوا الكتب بلاستيك مش كفاية عقول التلاميذ خشب تضارب في الكرارات يؤدي الى تطليع عيت المواتن و هو المتلوب
سابعا اعترض على موضوع المغاسل ده لانكم كده حتحربوني في لقمة عيشي امال انا اشتغل غسالة عند مين
سوق النضافة جبر و اتغندروا النتنين
ثامنا اشمعزة؟
تاسعا بند فيه ريحة دلع للمواطن و شخلعة و ده حسب ما فهمت ضد مبادئ المنظمة اذ ان الهدف هو شحورة المواطن و جعله يلف حوالين نفسه
عاشرا: اهو هو ده التقشف و لا بلاش و اهي فرصة نشيل الكرانيش من العلم كمان و يبقى علم اورديحي

حادي عشر نعلن عن قيام انقلاب على كل هذه الكرارات علشان النهاردة التلات و انا بحب اعارض النهاردة

و لا يسعني في النهاية الا ان ادعي عليكم ربنا يهدكم مليتو البلد

عين فى الجنة يقول...

سمباتيك احلى كلام انا ح اعين مفيد فوزى يكون المتحدث الرسمى بتاعى معاكى كل يوم تلات
الرفيقة حفصة ، لو عاوزة تشيلى الكرانيش من العلم ويبقى من غير استك كمان يبقى حنتفضح فى امريكا والدول المتغدمة
وبمناسبة الاهداف انتو عاوزين تدلعوا الشعب ولا تشنيروه ؟ على اساس الهدف سيتم تعديل القرارات الاقتصادية بما يتوائم مع رغباتكم المعلنة والخفية

DantY ElMasrY يقول...

بص يا عم راجى
لازم نلغى من دماغنا اى كلمة زى -بيع - شراء -تملك-
وحكاية تمليك ميكروباز لكل عمارة دا كلام فارغ
انت مسئوليتك انك توصلنى للمكان اللى انا عاوزه وبوسيلة مريحة
وانا اللى احدد الوسيلة كل مرة
يعنى لما اتصلك اطلب حنطور تجيبهولى
ولو غيرت رأيى وقلتلك توكتوك تجيبهولى بردك
وبعدين ايه حكاية شدو الحزام
هو اصلا احنا لقينا مواطنين عشان نطلع عنيهم
اللى يقوللى الزحمة والطوابير
واللى يكلم عن مواصلات عامة
هو فين الشعب أصلا
جيبو شعب
جيبو شعب
جيبو شعب

haoooy يقول...

بما حلوه بما دي ان واخوتها واولاد حكومتكم الموقره قد طلبة شعب انا الشعب فارجو ان امنح الجنسيه لدولتكم لكي اكون ان الشعب ولاينفسني احد في هذا المنصب فانا لااصحو من النوم الا الساعه اربعه عصرا واقوم ارتاح قليل لارجع وانامفلا خوف مني ودمتم حكومتنا الرشيده

^ H@fSS@^ يقول...

الشعب هاوي
تم قبولك كشعب من ضمن صفوف المواطنين و بالتالي حتكون انت اول واحد يمسك مهمة مراقبة الشعب

الله
الحزب
هلهلستان

haoooy يقول...

صباح الخير حكومتنا الرشيده انا المواطن رقم واحد في دولتكم اعزها الله وادما عزكم وشكر لكم على القرار الشجاع بمنحي صفت المواطن ولي طلب خلو القررات سطر واحد لاني معنديش وقت يادوب بصح من النوم علشان ارتح وارجع انام بسرعه يعني الرحمه للشعب الوحيد الي هو انا ولا اسوي عصيان واعمل مظهرات

haoooy يقول...

نسيت
الله
الحزب
هلهلستان
النوم