بما أنى و الحمد الله نلت ثقة الريسة الغالية و تم تعيينى مديرا للمخابرات الهلهلستانية المفتحة اوى فأننىأعلن القرارات الآتية التى جاءت بعد فحص و بحث و تحميص (تحميص دى جاية نتيجة أننا ادارة المخابرات الهلهستانية أصلا مقرها جوة فرن بلدى فى الحى العاشر) و قد جاءت جميعها لراحة و دلع المواطن الهلهستانى البسيط المهاود مخروم الدخل و قلنا نلحق ننشرها قبل ما الريسة ترفدنا من مناصبنا:ء
بند(1) يتم كتابة جميع قرارات و مكاتبات الحكومة الهلهلستاينة بالحبر السرى و بالشفرة حفاظا على صحة الشعب الهلهستانى و ده طبعا طبقا لأحدث الأبحاث العلمية المعملية الفذة اللى أثبتت أن الفهم بيقصر العمر و مفيش أحسن من طاعة ولى الأمر
بند(2) بما أنه بم يتم الحصول على شعب هلسهتانى لحد دلوقتى فيتم تعطيل بند واحد لحد ما نلاقى شعب و نذله
بند (3) تساهم أجهزة المخابرات الهلهستانية مع بقية أجهزة الحكومة فى البحث عن شعب لدولة هلهستان و من جهتنا قمنا بتأجير منادى سيارات سابق تم تدريبه على أحدث وسائل المخابرات و التجسس الحديثة الواردة فى أفلام جيمس بوند و رجل المستحيل و ما وراء الطبيعة ليقوم بعمل جولة فى دول المنطقة و العالم (و بدلات السفر النص بالنص طبعا) للبحث عن شعب يصلح للحكم الهلهستانى العالى قوى
بند (4)تضطلع (حلوة تضطلع دى ) المخابرات الهلهستانية المفتحة اوى بالتعاون مع أجهزة الإعلام العالمية ام بى سى 3 و سبيس تون لنشر المبادئ الهلستانية العليا والسفلى و اللى على جنب بين دول و شعوب المنطقة حتى نصل للحلم الهلهستانى العظيم بقيام اتحاد الدول الهلهستانية المتين من الخليج الحائر حتى المحيط اللى نايم بدرى
وقد تم اعتماد الشعارات الآتية للحملة العالمية (اشترى حكومة هلهستانية و أحصل على الأخرى مجانا) (عندنا كل مسئول بيمسك كذا منصب و بكدة السرقة أكيد حتقل ... ليه تتسرق أكتر لما ممكن تتسرق اقل)
و فى النهاية نعلن نحن مدير المخابرات و صاحب فرن العيش اللى فى الحى العاشر أن الإشاعات المغرضة عن قيام انقلاب هلهستانى ضد الرئيسة المحبوبة حفصة ليس لها أساس من الصحة مطلقا بتاتا فتاتا لأن الختم اللى بنختم بيه قرارات الانقلاب انا أصلا مخبيه فى حتة أمان و نحن على العهد باقون لحد ما نلاقى حد بيدفع عمولات اكتر
تحيا جمهوريه هلهستان الشعبيه الجماهيريه العظمى الراسماليه على اشتراكيه بالمهلبيه وعاشت طشت الملوخية
هناك 5 تعليقات:
وفقك الله اخي العزيز
لقد اصبت في نظرتي لك بتعيينك ف يمثل هذا المنصب الحساس الخطير المتفاني في تادية امن الوطن و الحكومة ضد المواطن
الله الحزب
هلهلستان
و نحن على العهد باقون لحد ما نلاقى حد بيدفع عمولات اكتر
ههههههههههههههههههههههههههههههههههههههههههههههههههههههه
فى انتخابات قريب لرئيس الإتحاد العالمى لأجهزة المخابرات ولازم هلهلستان تاخد المنصب الجامد دا
انت كفاءة وفاهم شغلك
فى مدون طيب اسمه ذو النونالمصرى
تيجى نعرض عليه منصب مواطن
اقتراح تانى ازاى هانضطهد الأقليات اللى عندنا احنا اربع رجالة واتنين ستات
اتنين ستات مين بس
انا و بنت القمر و كلبوزة و نسرين
اربعة اهو
و مهما كنتوا اغلبية هو حزب صوري نسائي اولي في الاصل
تحياتي
يا جدعان انتوا مش فاهمين مبادء التفكير الهلهستانى لسة ولا ايييه ؟؟
هنا الأقلية هى اللى لازم تضطهد الأغلبية و تعذبها كمان
يعنى لما يجيلنا مواطنين - عن قريب ان شاء الله - لازم نشوف مين عددهم أكبر و نبهدله ...... لازم هلهستان تعيش متفردة فى تفكيرها التأخرى الفوضوى الملعبك
إرسال تعليق