في وصف الدولة

دولة هلهلستان ، عاصمتها سبهللستان و تقع في افريسيا على بعد محطتين ميكروباز من اول ترعة المريوطية تقاطعا مع اول شارع المطار سكة اللي يروح ميرجعش ، و من اهم مدنها قرية الطناش كفر الاتكالية،مركز بير قمع

في وصف الحزب

حزب ذو شكل تكعيبي ... اولي الخلية ... احادي المعطيات ... غير معلوم الاهداف ... و لا مرجعية له على الاطلاق

الخميس، 6 مارس 2008

الخطة الانتخابية الشفتشية



لقيت نفسي فاضية قلت ارشح نفسي و ناوية انشر لكم (خطة انتخابية شفتشية) على غرار الشفافية بس احنا بقى خطتنا لا اي اي و لا زي زي و لا كل رئيس يتقاله يا مشمش و ناوية اظبط البلد و انظم الشوارع و كفاية سبهللة بقى و ندخل عصر جديد من الهلهلية

من اهم مشاكل العصر البائد الخنقة المرورية و انا ناوية بعون الله اشيل الخنقة المرورية و احط الخنقة في حتة تانية بس مش عارفة هي اية بالظبط دلوقتي بس مش حنغلب


حنفتح شارع صلاح سالم و نخليه رايح و الاوتوستراد نخليه جاي و بكده نوسع الشوارع و نشتري لكل وزير طيارة هليكوبتر و نسميها الحمامة و نبني فوق كل وزارة مطار و نسمية (غية الحمام ) علشان كل وزير مروح و طالع يركب الهليكوبتر بتاعته نقول عليه طالع (يسقي الحمام) و بكده نوفر على الناس الخنقة اللي بيعملها الوزرا لما يتحركوا من مكان للتاني و مش حننسى السادة الوزراء اللي مزهقنا حنركبهم صاروخ اللي يروح ميرجعش و حنسمية (صاروخ التراحيل) مع عدم نسيان مكافأة نهاية الخدمة و هي عبارة عن فرشاة التسريح المبتكرة المبكرة


من ضمن المنجهة اللي عايزة انعنش بيها الشعب الهلهلي اني اشتري مروحة متنقل لكل مواطن و بكده نبقى طرينا عليهم في الصيف و تلجناهم في الشتا


و يصرف مع كل مروحة عدد واحد مسمار قلاووز و خابور لكل مواطن لتثبيت قرارات الحكومة تثبيتا محكما ميخرش المية

طبعا لن انسى التعليم و حوفر على الاهالي المصاريف و وجع القلب و الاتناشر سنة تعليم اللي مطلعين عين ابوهم و نختزل السنوات الدراسية لتلات سنين( سنةابتدائي وسنة اعدادي وسنة ثانوي )و اول يوم في الدراسة ندي العيال الامتحان يذاكروه و اخر السنة نمتحنهم فيه و محدش يقولي ثلاث سنين مش كفاية و العيال حتطلع مش فاهمة حاجة لان اللي بيطلع عين ابوه اتناشر سنة و يتخرج بيطلع برضه مش فاهم حاجة فمفيش فرق يعني


اما في مجال الصحة فانا حريح الاخوة المرضى من الدنيا و بلاويها و حعمم فكرة (حقنة السعادة) و هي عبارة عن حقنة هوا لكل من تسول له نفسه انه يعيا و بكده اكون قضيت على فكرة المستشفيات و العلاج و وجع القلب و في الاخر المريض بيموت برضه فانا من الاول حوفر عليه المصاريف و العذاب

و من باب منجهة المواطن حنعمل الساحل الشمالي احياء يعني مثلا حي مدينة نصر- المهندسين- شبرا ..كده يعني علشان كل سكان حي يروحوا يصيفوا في القرية بتاعتهم و مفيش بقى نظام التاجير و التمليك و وجع القلب ده لا الفيلا اللي فاضية تسد و حنوزع مايوهات على الشعب لزوم البلبطة و اللي مش عايز بلاش ينزل البحر هليهلي كده بس خلي بالكم ساقوم بازالة كل مصدات الامواج علشان اللي ينزل يتسلك على برة على طول و بكده اكون حليت مشكلة زيادة السكان


و حعمل جوازات على كل محافظة و ممنوع تسافر من القاهرة الى الصعيد و العكس الا بتاشيرة علشان الصراحة الهجرة الى القاهرة بقت كتيرة قوي و البلد اتزحمت موت
و مش حنسى الاخوة الستات حنفذ لهم خطتي الشماء في البوست الماضي ( أنا الوزيرة ) و انصرهم على من يعاديهم هاي هي

لا استنوا عندي افكار كتير بس حبقى اقولهالكم بعدين ..بس مبدأيا كل اللي حينتخبني حياخد داستة جاتوه سواريه من لبوار و عشرين جنيه حتتين يعني مقسومة نصفين نصف قبل الحفرة و نصف بعدها اقصد يعني نصف ياخده المنتخب قبل الانتخابات و نصف العشرين جنيه التاني بعد ظهور النتيجة

اه ..ناصحة انا
و لا تنسوا رمزي الانتخابي (مشبك على مشبك) للنشر و البلجرة
يلا ....سوقوا بقى
مرشحتكم سمباتيك

هناك 8 تعليقات:

^ H@fSS@^ يقول...

وانا عن نفسي اقر بخطتك الجهنمية و اوافق على ترشيحك كرئيسة حزب
يلا وريني همتك في جمع التبرعات و الاصوات و عليا المفروض بقى يكون حقي اكب رمن دستة جاتوة من لابوار
خليها تورتة بحالة

الله
الحزب
هلهلستان

كلبوزة لكن سمباتيك يقول...

شكلنا يا حفصتشي انا و انتي بس اللي فضلنا في الحزب و الباقيين يا اما هربوا يا اما اتقبض عليهم بتهمة الانقلاب ما احنا بس اللي متسلكين برة و بما اننا بس اللي موجودين فاحنا نعمل الرئاسة بالدور انت يوم و انا يوم
اما بخصوص التورتة فانا اشتريتها تورتة سويسرول بالشيكولاه و البندق و معاهم فنجانيين كاكاو بس لو اتاخرتي حاكلها كلها
ده الشعب ده حيشوف ايام على ادينا(زوزة و بكابوزة)
للحكم و الاستئناف
و عايزة اقولك العشيين جنيه حديهملك حتة واحدة لاني واثقة في ولائك بس متنسيش انت تستنضفلنا قيمة عشرميت خستميت نسمة من الشعب المستورد علشان نحكمهم
يلا سي يو

DantY ElMasrY يقول...

باب الترشيح هاينقفل بكره
عاوز مرشح كمان غير سمباتيك
علشان نناقش البرامج ونقارنهم ببعض
زى كل الدول المتقدمة

Empress appy يقول...

لا انا مليش بس متبعاكم وموافقه على خطه سمبتيك جدا لان بجد انا عندى ازمه مرور نيله وشكلها كده هتحلها معاك يا مشبك ههههههههههه قصدى يا ريس

DantY ElMasrY يقول...

ماشى يا شعب
عندنا مرشحة رسمية اسمها كلبوزة
وشهرتها سمباتيك
ورمزها مشبك الغسيل
شعار نظيف
وعندنا مرشحة تانية هى الريسة الحالية لجمهوريتنا الفاضلة
اسمها حفصة
وشهرتها حفصوتشا
بس لسه ماخترتش رمز
وعلى ما تختار رمز نعلن ان التصثويت على الريسة الجديدة يوم السبت
والريسة اللى هاتخسر ماتزعلش من أوها وتقول الانتخابات مزورة
هاتشارك فى الحكم بمنصب نائب الرئيس
ورئيس مجلس من المجالس اللى مالية البلد
وأوعدها بوزارتين وخمس سفارات

^ H@fSS@^ يقول...

يا عيني يا عيني يا عيني على الوله
يا عيني يا عيني
هو فين الشعب؟؟
طيب هما فين الاعضاء اصلا
يا حسرتي على العباد
يا حسرتي على الاعضاء
اهئ اهئ اهئ

DantY ElMasrY يقول...

اوكى سمباتيك هاتفوز بالتزكية؟
بس دا مش من دستور هلهلستان
بكره هاعلن خطبة ترشيحى لرئاسة الجمهورية
من مدرسة بنباقادن الإبتدائية

كلبوزة لكن سمباتيك يقول...

الاخت حفصة شعارها الانتخابي جواز عتريس من فؤاده باطل باطل

و انا شخصيا بدي صوتي لاختشي و حبيبتشي حفصة و ارفض تعييني بالتزكية و يا اما 99.9 يا بلاش


الاخ دانتي المناضل
الازمة ازمة شعب مش ازمة حكام
و ابقوا فكروني استورد كام شوال شعب من شعبستان المجاورة

تحياتشي